စာရေးဆရာမောင်ဆုရှင်ကို ယနေ့  ညနေ (၂) နာရီတွင် ရန်ကုန်မြို့ရေဝေးသုသာန်တွင် မီးသဂြုင်္ိဟ်ခဲ့သည်။ ၎င်း၏ ဈာပနကို စာပေအသိုင်းအ၀ိုင်း ဆွေမျိုးမိတ်ဆွေများ (၁,၀၀၀) ကျော် လာရောက်ပို့ဆောင်ကြကြောင်း ပြည်တွင်းမှ စာရေးဆရာတဦးက ပြောသည်။
ဆရာမောင်ဆုရှင်သည် ၂၀၀၉ ခု၊ ဇွန်လ (၂) ရက်၊ နံနက် (၁) နာရီကျော်တွင် SSC ရွှေဂုံတိုင်အထူးကုဆေးရုံတွင် ကွယ်လွန်ခဲ့ပြီး ကွယ်လွန်ချိန်တွင် အသက် (၇၈) နှစ်ရှိပြီဖြစ်သည်။
ဆရာမောင်ဆုရှင်ကို မြောင်းမြမြို့တွင် အဖ ဦးချစ်ဖေ၊ အမိ ဒေါ်စိန်မြင့်တို့မှ ၁၉၃၂ ခုနှစ်၊ ဇန်န၀ါရီလ (၁) ရက် နေ့တွင် မွေးဖွားခဲ့ပြီး အမည်ရင်းမှာ ဦးမျိုးသန့်ဖြစ်သည်။
မောင်ဆုရှင်ကလောင်အမည်မှာ အအောင်မြင်ဆုံးဖြစ်ပြီး မောင်ကောင်းမြင့်၊ မောင်ကြည်ဖြူ၊ ဦးဘခန့်၊ မျိုးသန့်၊ ၀င်းသန့်၊ အောင်သူ ဟူသော ကလောင်ခွဲများဖြင့်လည်း သုတ၊ ရသစာပေများကို ရေးသားခဲ့ကြောင်း မိသားစု ပြောပြချက်အရ သိရသည်။
ဆရာမောင်ဆုရှင် ရေးသားခဲ့သော ဘာသာပြန် စာအုပ်များအနက် ပင်လယ်ပြာနဲ့ တံငါအို စာအုပ်ကြောင့် ကမ္ဘာကျော် စာရေးဆရာကြီး အားနက်စ်ဟဲမင်းဝေး၏ စာပေအရေးအသားကို မြန်မာဘာသာဖြင့် ဖတ်နိုင်သည့်အတွက် ဆရာမောင်ဆုရှင်ကို ကျေးဇူးတင်နေကြောင်း လူငယ် စာဖတ်ဝါသနာတဦးက ပြောသည်။
“ကျနော်က ပဲခူးကပါ။ ဆရာ့ကို အပြင်မှာ မမြင်ဖူးပါဘူး။ သတင်းစာမှာ ဆရာ့နာရေးပါတာတွေ့တော့ လာခဲ့တာပါ။ ကျနော်က ဆရာ့ရဲ့ဘာသာပြန်ကို ဖတ်ထားတာဆိုတော့ ဆရာဆုံးတာ စိတ်မကောင်းဖြစ်မိတယ်။ ဒါ့ကြောင့်
သဂြုင်္ိဟ်မယ့်နေ့မှာ လာခဲ့တာပါ” ဟု ပဲခူးမြို့မှ အဆိုပါ လူငယ်က ပြောသည်။
ဆရာသည် အမေရိကန်နိုင်ငံ ဆရာကျုပ်တက္ကသိုလ်နှင့် ဘော့စတွန် တက္ကသိုလ်တို့မှ သတင်းစာပညာ ဒီပလိုမာနှင့် စာအုပ်ထုပ်ဝေရေးပညာ ဒီပလိုမာများကို ၁၉၆၂ ခုနှစ်တွင် ရရှိခဲ့ပြီးနောက် ၁၉၅၃ ခုနှစ်မှစ၍ ပြန်ကြားရေးဝန်ကြီးဌာန စာပေဗိမာန်တွင် ညွှန်ကြားရေးမှူးချုပ်အဆင့်အထိ ထမ်းဆောင်ခဲ့ကာ ပြန်ကြားရေးဝန်ကြီးဌာန အကြံပေး အရာရှိအဖြစ်လည်း ပူးတွဲတာဝန် ထမ်းဆောင်ခဲ့သည်။
ထို့အပြင် အမျိုးသားစာပေဆု စိစစ်ရွေးချယ်ရေးအဖွဲ့ အတွင်းရေးမှူး၊ ပခုက္ကူဦးအုန်းဖေ စာပေဆုရွေးချယ်ရေးအဖွဲ့ ဥက္ကဋ္ဌ၊ စာပေဗိမာန်စာမူဆု စိစစ်ရွေးချယ်ရေးအဖွဲ့ အဖွဲ့ဝင်၊ သုတစွယ်စုံစာပေဆုရွေးချယ်ရေးအဖွဲ့ စသည့်တာဝန် များနှင့် နိုင်ငံတော်အဖွဲ့အစည်းများ၏ စာပေဆိုင်ရာ တာဝန်များကိုလည်း ထမ်းဆောင်ခဲ့သည်။
ဆရာမောင်ဆုရှင်သည် ၁၉၅၄ ခုနှစ်မှ သေဆုံးသည်ထိ စာအုပ်ပေါင်း (၁၀၀) ကျော် ရေးသားပြုစုခဲ့ပြီး စာရေးဆရာ မောင်ပေါ်ထွန်းနှင့်အတူ စာအုပ်ဟူသည် ၁၉၇၂၊ စာရေးဆရာ သိန်းတန် ဟံသာဝတီနှင့် စာနယ်ဇင်းဟူသည် ၁၉၇၄ တို့ကို ရေးသားခဲ့သေးကြောင်း သိရသည်။
No comments:
Post a Comment