တိုက်လေယာဉ် (၁) စီး ရန်ကုန်လေဆိပ်တွင် ပျက်ကျလေကြောင်းခရီးစဉ်များ မပြောင်းလဲ

ရန်ကုန်အပြည်ပြည်ဆိုင်ရာ လေဆိပ်တွင် လေယာဉ်တစီး ယနေ့နံနက် (၇) နာရီ မတိုင်မီက ပျက်ကျရာ အသက် (၂၃) နှစ် အရွယ် ပိုင်းလော့ဗိုလ်ကြီး ပြည့်ဖြိုးမျိုးဆိုသူ သေဆုံးသွားကြောင်း မင်္ဂလာဒုံလေတပ်မှ အရာရှိတဦးက ပြောသည်။

မောင်းနှင်သောလေယာဉ်မှာ တရုတ်နိုင်ငံလုပ် F-7 အမျိုးအစား တယောက်စီး ဂျက်တိုက်လေယာဉ် အမျိုးအစားဖြစ်ပြီး ယနေ့နံနက်က လေဆိပ်တွင် လေ့ကျင့်နေချိန် ပျက်ကျခြင်းဖြစ်ကြောင်း သိရသည်။

“အဆင်းမှာ ဖြစ်တာဗျ၊ ဘီးကို ချမရတော့ဘူး။ ဒါ့ကြောင့် ရှပ်တိုက်ဆင်းလိုက်တော့ မီးလောင်သွားတယ်။ ပိုင်းလော့ကတော့ မီးလောင်တာလည်း ပါတယ်၊ အမြင့်က ပြုတ်ကျတာလည်း ပါတဲ့အတွက် အသက်ဆုံးရှုံးရတယ်။ အဲဒီ ပိုင်းလော့က တော်တဲ့ လူငယ်တယောက်ပါ” ဟု အဆိုပါလေတပ်အရာရှိက ပြောသည်။

အဆိုပါဖြစ်စဉ်နှင့်ပတ်သက်၍ လေဆိပ်လုံခြုံရေးများက ယနေ့ တနေကုန် လေဆိပ်သို့လာသော ဧည့်သည်များကို စစ်ဆေးမှုများ ပိုမိုလုပ်ခဲ့ကြောင်း လေဆိပ်သို့ သွားရောက်ခဲ့သူတဦးက ပြောသည်။ ယင်းသို့ တိုက်လေယာဉ် ပျက်ကျခဲ့သော်လည်း လေကြောင်းခရီးစဉ်များ အပြောင်းအလဲမရှိကြောင်း သိရသည်။

မြန်မာနိုင်ငံ၌ F-7M အမျိုးအစား ဂျက်တိုက်လေယာဉ် (၄၈) စီး တရုတ်နိုင်ငံမှ ၀ယ်ယူထားသည်ဟု ဗြိတိန်အခြေစိုက် sinodefence.com တွင် ဖော်ပြပါရှိသည်။

ဗွီအိုအေ

မြန်မာစစ်အစိုးရ လေတပ်ပိုင် တိုက်လေယာဉ်တစင်း မင်္ဂလာဒုံမှာ ဒီကနေ့ ပျက်ကျ သွားခဲ့ပြီး လေယာဉ်မှူးလည်း သေဆုံးသွားပါတယ်။ တရုတ်နိုင်ငံလုပ် အဲဒီ F-7 II K အမျိုးအစား တိုက်လေယာဉ်ဟာ လေယာဉ်ပြေးလမ်းပေါ် အဆင်းမှာ အဆင်းဂီယာ အလုပ်မလုပ်တဲ့ အတွက် ပျက်ကျသွားတာလို့ မျက်မြင်တဦးက ပြောပါတယ်။

တရုတ်နိုင်ငံလုပ် F-7 II K အမျိုးအစား ဂျက်တိုက်လေယာဉ်ဟာ ဒီကနေ့ မနက်ပိုင်း ၁၀ နာရီကျော်ကျော်လောက်မှာ မင်္ဂလာဒုံ လေတပ်စခန်းကို ပြန်အဆင်း လေယာဉ်အဆင်းဂီယာ အလုပ်မလုပ်တော့ဘဲ ပျက်ကျသွားခဲ့တာလို့ မျက်မြင်သက်သေတဦးက ပြောပြပါတယ်။

“ဟုတ်ပါတယ်ခင်ဗျာ။ ခန့်မှန်းချေ ၁၀ နာရီ ၁၅ လောက်မှာပါ။ လေယာဉ်မှူး သေသွားတယ်။ လေယာဉ်ပျံလည်း ပြန်ဆွဲသွားပါပြီ။ ဒီမှာ ကျနော်တို့ မြင်နေရတယ်၊ လေယာဉ်ပျံ ပြန်ဆွဲသွားပါပြီ။ လူကတော့ သေတယ်ဆိုတာ သူတို့ပြောပြလို့ သိရပါတယ်။ ညနေက ဆွဲသွားတာ တွေ့လိုက်ပါတယ်။ တပ်ကကားနဲ့ပဲ လာဆွဲသွားတာ တွေ့လိုက်တယ်။ ဆယ်ဘီးကားကြီးနဲ့ တာလဘတ်ကြီး အုပ်ပြီးတော့ ဒီညနေကျမှ ဆွဲသွားတယ်။ လေယာဉ်မှူးက ဗိုလ်ကြီး၊ အသက် ၃၀ ကျော်လောက် ရှိမယ်။

“အဆင်းမှာ ဖြစ်တာ။ Run Way တ၀က်လောက်မှာ ကျနော် တွေ့လိုက်တာ မီးခိုးတွေနဲ့ တွေ့လိုက်တယ်။ Landing Gear မကျဘူး ဆိုတဲ့သဘော ဖြစ်သွားတာ။ ဂီယာမကျတော့ သူပြန်ဆွဲတင်တာ ဆွဲတင်လို့ မရတော့ဘူး။ ပြီးတော့ သူက လေထီး ဖွင့်လိုက်တယ်။ ဖွင့်လိုက်တော့ လူက ထွက်သွားတယ်။ လေယာဉ်ပျံက ရှေ့ကိုဆက်သွားပြီး ခြံစည်းရိုးနဲ့ ထိတော့ လေယာဉ်ပျံက ရပ်သွားတယ်။

“လူနဲ့ လေယာဉ်ပျံနဲ့က ပေ ၃၀ လောက် ကွာတယ်လို့ ပြောပါတယ်။ လေထီးနဲ့ သူဆင်းတယ်၊ ဒါပေမဲ့ လေထီးက မပွင့်ဘူး။ အပေါ်ကို ပေ ၂၀ လောက် တက်သွားတယ်လို့ ပြောတယ်။ ပြီးတော့ အဲဒီက ပြန်ပြုတ်ကျသွားတာ။ အသားတွေ ဘာတွေ အကုန်လုံး နာသွားတယ် ပြောတယ်။ မျက်နှာတွေ စုတ်ပြတ်သွားတယ်။ အဲဒီမှာတင်ပဲ ငုတ်တုတ်သေတယ်လို့ ပြောတယ်။”

အဲဒီ ဂျက်တိုက်လေယာဉ်ပေါ် ပါလာတဲ့ လေယာဉ်မှူး ဗိုလ်ကြီး ပြည့်ဖြိုးမျိုးက လွဲလို့ မြေပြင်မှာ တခြား ထိခိုက်ဒဏ်ရာရတဲ့သူ မရှိပေမဲ့ လေယာဉ်နဲ့ တိုက်မိပြီး လေဆိပ် ခြံစည်းရိုးတော့ ပျက်ဆီးသွားတယ်လို့ အဲဒီ မျက်မြင်သက်သေက ပြောပါတယ်။ ညနေစောင်းပိုင်းမှာတော့ လေယာဉ်ပျက်ကျခဲ့တဲ့ နေရာကို ပို့ဆောင်ဆက်သွယ်ရေး ၀န်ကြီးကိုယ်တိုင် လာရောက်စစ်ဆေးပြီး ပျက်သွားတဲ့ ခြံစည်းရိုးကို ညတွင်းချင်း ချက်ချင်း ပြန်ပြင်ခိုင်းသွားတယ်လို့ အဲဒီ မျက်မြင်သက်သေက ဆက်ပြောပါတယ်။

“ဒီနေ့ ညတွင်းချင်းအပြီး လုပ်ဖို့။ ပို့ဆက်ဝန်ကြီးက လုပ်ခိုင်းထားတယ်ပြောတယ်။ ပို့ဆက်ဝန်ကြီးလည်း ရောက်နေပြီ။ ၀န်ကြီးက ညနေပိုင်း အခုလေးတင် ဆင်းသွားတာ၊ သိပ်မကြာသေးဘူး။”

တရုတ်နိုင်ငံလုပ် F-7 II K အမျိုးအစား ဂျက်တိုက်လေယာဉ် မင်္ဂလာဒုံ လေတပ်စခန်း အနီးမှာ ဒီကနေ့ ပျက်ကျသွားခဲ့တာနဲ့ ပတ်သက်လို့ မျက်မြင်သက်သေတဦးက ပြောပြသွားတာ ဖြစ်ပါတယ်။