ဧရာဝတီ
နိုင်ငံခြားဝင်ငွေ ရှာဖွေပေးနိုင်သည့် ပင်လယ်ကူး သင်္ဘောသား အရေအတွက် တိုးမြှင့်ရန် အလုပ်အကိုင် ဆိုင်ရာ ကန့်သတ်ချက်များကို စတင် ဖယ်ရှားလိုက်ပြီ ဖြစ်ကြောင်း ရေကြောင်း ပို့ဆောင်ရေး ညွှန်ကြားမှု ဦးစီးဌာန အရာရှိကြီးတဦးက အင်္ဂါနေ့တွင် ပြောကြားလိုက်သည်။
စိတ်ပါဝင်စားသူ လူငယ်တိုင်း သင်္ဘောသားများ ဖြစ်လာရေး အတွက် အရှိန်အဟုန်မြှင့် ဆောင်ရွက်မည်ဟု ထိုဌာနမှ ညွှန်ကြားရေးမှူးချုပ် ဗိုလ်မှူးကြီး မောင်မောင်ဦးက သတင်းထောက်များကို ပြောသည်။
ယခင်က နိုင်ငံခြားသင်္ဘော ကုမ္ပဏီတခု၏ အလုပ်ခန့်စာ ရှိသူများကိုသာလျှင် အာဏာပိုင်တို့က သင်္ဘောသားအဖြစ် အသိအမှတ် ပြုကာ ပင်လယ်ကူး သင်္ဘောသားဆိုင်ရာ သင်တန်းများ တက်ရောက်ခွင့် ပြုပြီး သင်္ဘောသား လုပ်သက် မှတ်တမ်းစာအုပ်၊ သင်္ဘောသား နိုင်ငံကူးလက်မှတ် တို့ကို ထုတ်ပေးခဲ့သည်။
“အလုပ်ခန့်စာ မလိုတော့ဘူး။ အခြေခံပညာ အထက်တန်း အဆင့် ရှိရုံနဲ့ သင်္ဘောသား လုပ်ခွင့် ပေးတာ။ ရေကြောင်းဌာနက ပေးတဲ့ သင်တန်းပြီးတာနဲ့ သင်္ဘောလိုက်လို့ရပြီ” ဟု မြန်မာနိုင်ငံ ပင်လယ်ကူး သင်္ဘောသားများ အသင်း (MOSA) မှ တာဝန်ရှိသူ တဦးက ပြောသည်။
အင်္ဂလိပ်စာ အရည်အချင်းမီပါက သင်တန်းများ တက်ခွင့်ပြုပြီး သင်္ဘောသားဖြစ်နိုင်ပြီဟု ဆိုသည်။
ယခင်က Appointment ဟု ခေါ်ကြသည့် ကုမ္ပဏီအလုပ်ခန့်စာ မရှိမဖြစ် လိုအပ်သဖြင့် အလုပ်ခန့်စာ ရောင်းချသည့် ဈေးကွက် ပေါ်ထွန်းခဲ့သည်။ သင်္ဘော ကုမ္ပဏီ အကြီး၊ အသေးပေါ် မူတည်၍ အလုပ်ခန့်စာ တခုလျှင် သိန်း၂၀ ၀န်းကျင်အထိ ပေးခဲ့ရသည်။ ယခု စနစ်သစ်ကြောင့် အလုပ်ခန့်စာဈေးကွက် ပျက်စီးသွားသည်။
“အစိုးရ ပြင်ဆင်လိုက်တဲ့ အချက်ကြောင့် ကုမ္ပဏီတွေ တော်တော် ထိကုန်ပြီ။ တချို့လည်း ကုမ္ပဏီ ပိတ်ဖို့ ပြင်ကုန်ပြီ” ဟု သင်္ဘောလိုင်း ကိုယ်စားလှယ်တဦးက ပြောသည်။
မြန်မာပြည်တွင် နိုင်ငံခြားသင်္ဘောလိုင်းများ၏ ကိုိယ်စားလှယ် ကုမ္ပဏီပေါင်း ၁၅၂ ခု ရှိကြောင်း သိရသည်။
သင်္ဘောသား အလုပ်အကိုင် ဈေးကွက်တခုလုံး အာဏာပိုင်တို့၏ ထိန်းချုပ်မှုအောက်သို့ အပြည့်အ၀ ရောက်ရှိသွားပြီဟု ရန်ကုန်မြို့မှ သင်္ဘောသား တဦးက သုံးသပ်သည်။
“အရင်က ပိုက်ဆံပေးပြီး သင်္ဘောသားဖြစ်လို့ရတယ်။ အခု အစိုးရရဲ့ ထိန်းချုပ်မှုအောက် ရောက်သွားတဲ့ အတွက် ပိုက်ဆံပေးတိုင်းလည်း သင်္ဘောသား ဖြစ်ခွင့် ရချင်မှရမယ်။ ပိုခက်သွားတယ်လို့ ပြောလို့ ရတယ်” ဟု သူက ဆိုသည်။
အစိုးရသည် နိုင်ငံခြားသင်္ဘောကုမ္ပဏီ ကိုယ်စားလှယ်များ၏ စီးပွားရှာသည့် လုပ်ငန်းကို လုယူလိုက်ခြင်း ဖြစ်သည်ဟု ဆိုနိုင်ကြောင်းလည်း အစိုးရပိုင် မြန်မာ့ ကြယ်ငါးပွင့် သင်္ဘောလုပ်ငန်းမှ အရာရှိတဦးက ပြောသည်။
“လူငယ်တိုင်း ကန့်သတ်ချက် မရှိဘဲ သင်္ဘောသားသင်တန်းတွေ တက်ခွင့်ရမှာ ဖြစ်ပေမယ့် ဒီသင်တန်းတွေ အတွက် အစိုးရကို သင်တန်းကြေး သိန်းပေါင်းများစွာ ပေးရလိမ့်မယ်” ဟု ထိုအရာရှိက ခန့်မှန်းသည်။
သင်္ဘောသား အရေအတွက် များလာခြင်းကြောင့်လည်း မြန်မာပြည်အတွက် နိုင်ငံခြားဝင်ငွေ ပိုမို တိုးပွားစေမည် ဖြစ်ကြောင်း ရန်ကုန်မြို့မှ စီးပွားရေးပညာရှင်တဦးက သုံးသပ်သည်။
မြန်မာနိုင်ငံတွင် မှတ်ပုံတင်ထားသည့် မြန်မာသင်္ဘောသား ၇၀၀၀၀ နီးပါး ရှိကြောင်း၊ သင်္ဘောတက်သူ ၅၀၀၀၀ သာ ရှိကြောင်း ရန်ကုန်မှ MOSA အသင်း၏ တရားဝင် ထုတ်ပြန်ချက် အရ သိရှိရသည်။
လုပ်ငန်းခွင်အတွင်း သက်စွန့်ဆံဖျား၊ ပင်ပင်ပန်းပန်း လုပ်ကိုင်ရသည့် သင်္ဘောသားများသည် မြန်မာနိုင်ငံ၏ စံနှုန်းအရ ၀င်ငွေကောင်းသူများ ဖြစ်သည်။ ၁၉၈၈ ခုနှစ်မတိုင်ခင်က သင်္ဘောသားများသည် ပြည်ပမှ မော်တော်ယာဉ် တင်သွင်းခွင့် ရသူများအဖြစ် ထင်ရှားသည်။
၁၉၇၀ နှင့် ၁၉၈၀ ပြည့်လွန်နှစ်များသည် မြန်မာနိုင်ငံ၏ “သင်္ဘောသားရွှေခေတ်” ဖြစ်သည်ဟု ဘန်ကောက်မြို့ မှ ကိုသူရက ပြောသည်။
ယခုအခါ သင်္ဘောသားသစ်တဦးသည် အနည်းဆုံး လစာ ဒေါ်လာ ၃၀၀ ကျော်၊ အလုပ်သင် အရာရှိတဦးသည် လစာ ဒေါ်လာ ၆၀၀ ခန့် ရရှိကြောင်း၊ ကုမ္ပဏီတခုနှင့်တခု လစာနှုန်းထား မတူညီကြောင်း ကိုသူရက ရှင်းပြသည်။
No comments:
Post a Comment