မြန်မာနိုင်ငံအတွက် အမေရိကန်ဒေါ်လာ (၂၃) သန်းကျော်နှင့်ညီမျှသည့် ယူရိုငွေ (၁၇.၂၅) သန်းကို လူသားချင်းစာနာမှု အကူအညီအဖြစ် ဥရောပသမဂ္ဂ (အီးယူ) က ယခုနှစ်တွင် ပေးသွားမည်ဟု ယမန်နေ့က ကြေညာလိုက်သည်။
အကူအညီများကို အီးယူကော်မရှင်၏ လူသားချင်းစာနာထောက်ထားမှု အကူအညီပေးရေးအဖွဲ့ (ECHO) မှတဆင့် မြန်မာနိုင်ငံ နယ်စပ်ဒေသတို့ရှိ တိုင်းရင်းသားလူမျိုးစုများနှင့် ထိုင်းနိုင်ငံ စခန်းများတွင် နေထိုင်နေကြသည့် သူများကို ပေးအပ်သွားမည်ဟု ဘန်ကောက်ရှိ အီးယူရုံးခွဲက ပြောကြားသည်။
“အထူးသဖြင့် အကူအညီမဲ့နေကြတဲ့ ဝေးလံခေါင်ဖျား နယ်စပ်ဒေသတို့မှာ နေထိုင်သူတွေအတွက် အရေးပေါ်အကူအညီတွေ လိုအပ်နေပါတယ်” ဟု ဘန်ကောက်ရှိ အီးယူသံအမတ်ကြီး ဒေးဗစ် လစ်ပ်မန်က ပြောကြားသည်။
အီးယူက ယခုပေးမည့် အကူအညီသည် လူသားချင်းစာနာမှုဆိုင်ရာ အကူအညီ သက်သက်သာဖြစ်ပြီး ဘေးအန္တရာယ်နှင့် ရင်ဆိုင်နေရသည့် တိုင်းရင်းသားများကို အလိုအပ်ဆုံးအကူအညီများ ပေးသွားမည်ဖြစ်ကြောင်း ၎င်းက ပြောသည်။
ကူညီထောက်ပံ့ငွေများအနက် ယူရို (၉.၂၅) သန်းကို ရခိုင်၊ ရှမ်း၊ မွန်၊ ကရင်၊ ကယား၊ ကချင်ပြည်နယ်တို့နှင့် တနင်္သာရီတိုင်း အတွင်းရှိ နယ်စပ်ဒေသတို့မှ တိုင်းရင်းသားလူမျိုးစုများအတွက် ကျန်းမာရေးနှင့် အစားအစာ အစီအစဉ်များတွင် သုံးစွဲမည်ဖြစ်ပြီး ကျန် ယူရို (၈) သန်းမှာ ထိုင်းနိုင်ငံရှိ စခန်းများမှ ကရင်ဒုက္ခသည် (၁) သိန်းခွဲတို့အတွက် လျာထားကြောင်း သိရသည်။
အီးယူက ၁၉၉၄ ခုနှစ်ကတည်းက မြန်မာနိုင်ငံအတွက် ကယ်ဆယ်ရေးရန်ပုံငွေများ ထောက်ပံခဲ့ပြီး ၂၀၀၅ ခုနှစ် အောက်တိုဘာတွင် အီးယူကော်မရှင်၏ လူသားချင်းစာနာထောက်ထားမှု အကူအညီပေးရေးအဖွဲ့က မြန်မာနိုင်ငံ၌ ရုံးဖွင့်လှစ်ခဲ့သည်။
၂၀၀၈ ခုနှစ် မေလတွင် မြန်မာနိုင်ငံ ဧရာဝတီမြစ်ဝကျွန်းပေါ်ဒေသ၌ နာဂစ်ဆိုင်ကလုန်း မုန်တိုင်းဒဏ်ကြောင့် လူပေါင်း (၁) သိန်း (၄) သောင်း သေဆုံး၊ ပျောက်ဆုံးခဲ့ရပြီးနောက် နာဂစ်အရေးပေါ် ကယ်ဆယ်ရေးလုပ်ငန်းများအတွက် အီးယူက ၂၀၀၈ ခုမှ ၂၀၀၉ ခုနှစ်အတွင်း ယူရိုငွေ (၃၉) သန်း ကူညီထောက်ပံ့ခဲ့သည်။
Subscribe to:
Post Comments (Atom)
No comments:
Post a Comment