သက်တမ်း သုံးနှစ် အသုံးပြု နိုင်သည့် မြန်မာ့ စီးပွားရေး ဘဏ်၏ Online Smart Card ဖြင့် ငွေကြေး ၀န်ဆောင်မှု လုပ်ငန်း များအား မြန်မာ နိုင်ငံရှိ ဘဏ်ကြီး ခုနစ်ဘဏ် တွင် စတင် အသုံးပြု နိုင်ပြီ ဖြစ်ကြောင်း သိရသည်။ ယင်း Online Smart Card ဖြင့် ငွေကြေး ၀န်ဆောင်မှု လုပ်ငန်း များအား နေပြည်တော် ဘဏ်ခွဲ၊ ရန်ကုန်မြို့ ဘဏ်ခွဲ(၁) ၊ ဘဏ်ခွဲ(၂)၊ ဘဏ်ခွဲ(၅) ၊ ငွေစုဘဏ်ခွဲ(၃) ၊ မန္တလေး ဘဏ်ခွဲ(၁) နှင့် ဘဏ်ခွဲ(၂) တို့တွင် စတင် အသုံးပြု နိုင်ပြီ ဖြစ်ကြောင်း ဘဏ္ဍာရေး နှင့် အခွန် ၀န်ကြီး ဌာန၊ မြန်မာ့စီးပွားရေး ဘဏ်၏ ထုတ်ပြန်ချက်များ အရ သိရသည်။ Online Smart Card အသုံးပြု ရာတွင် မြန်မာ့ စီးပွားရေး ဘဏ်၌ စာရင်းရှင် စာရင်း (သို့) ငွေစုဘဏ် စာရင်း တစ်ခုခု ဖွင့်လှစ် ထားသူ ဖြစ်ရမည် ဖြစ်ပြီး Online Account စာရင်း စတင်ဖွင့်လှစ် ရခြင်း အတွက် အနည်းဆုံး ငွေသား ဆယ်သိန်းဖြင့် ဖွင့်လှစ် ရမည် ဖြစ်ကြောင်း သိရသည်။ Online Account ဖွင့်လှစ်ပြီး ပါက Online Smart Card တစ်ခု နှင့် Online ငွေမှတ် စာအုပ် Online Pass book စာအုပ် တို့ကို ထုတ်ပေး သွားမည် ဖြစ်ကြောင်း သိရသည်။
ငွေထုတ် ငွေသွင်း ပြုရာ တွင်လည်း Online Account တွင် ကျပ်သောင်း ဂဏန်း အလီလီဖြင့် အကန့် အသတ် မရှိ ငွေသွင်း ငွေထုတ် ပြုလုပ် နိုင်ကြောင်း သိရသည်။ အဆိုပါ Online Account အသုံးပြုပြီး ငွေထုတ်၊ ငွေပေးခြင်းများ အတွက် ငွေလွှဲ ခတွင် တစ်ရာ ကျပ်လျှင် ဆယ်ပြားနှုန်း သုည ဒသမ တစ်ရာ ခိုင်နှုန်း ဖြစ်ကြောင်း သိရသည်။ “ဒီစနစ် အသုံးပြုပြီး ဒေသ တစ်ခုခုသို့ ငွေကြေး အမြောက် အများ သယ်ဆောင် ရသည့် ဒုက္ခမှ ကင်းဝေးမှာ ဖြစ်ပါတယ်။ ဒီကတ်နဲ့ မိမိစာရင်း ဖွင့်ထားတဲ့ ဘဏ်နှင့် ဆက်သွယ် ထားတဲ့ Online ဘဏ်ခွဲကြီး တွေမှာ လိ်ုတဲ့ ငွေကို ထုတ်ယူနိုင် ပါတယ်။ ကတ်ကို ပြုလုပ်တဲ့ နေရာမှာ မိမိဘဏ် စာရင်း သွင်းထားတဲ့ ဘဏ်မှာ သာ ပြုလုပ် ရမှာ ဖြစ်ပြီး ထုတ်ယူတဲ့ နေရာတော့ တခြား သတ်မှတ် ထားတဲ့ ဘဏ်တွေ မှာပါ ထုတ်ယူ နိုင်ပြီး အခက် အခဲတော့ မရှိပါဘူး။ ပို အဆင်ပြေ နိုင်ပါတယ်” ဟု ငွေစုဘဏ်ခွဲ (၃) မှ ဘဏ်ဝန်ထမ်း တစ်ဦးမှ ပြောသည်။ ကတ် ပျောက်ဆုံး ပါက သက်ဆိုင်ရာ ဘဏ်သို့ တရားဝင် အကြောင်းကြား ပါက ကတ်အစားထိုး ပြန်လည် ထုတ်ပေးမည် ဖြစ်ကြောင်း ဘဏ္ဍာရေး နှင့် အခွန်ဝန်ကြီး ဌာန မြန်မာ့ စီးပွားရေး ဘဏ်၏ တရားဝင် ထုတ်ပြန် ချက်များ အရ သိရကြောင်း ၂၀၁၀ ခုနှစ် ဇွန်လ ၁၇ ရက်နေ့ထုတ် ရန်ကုန်တိုင်း(မ်) ဂျာနယ်တွင် ဖော်ပြထား ပါသည်။
No comments:
Post a Comment