ပေါက်ပေါက်
ရှမ်းပြည်မြောက်ပိုင်း နမ်းခမ်းနှင့် မန်တုံမြို့နယ်အတွင်း ဘိန်းခင်းများတွင် ယခုအခါ အပွင့်ပွင့်နေပြီး အချို့မှာ အသီးများ စတင်သီးနေကာ မကြာမီ အချိန်အတွင်း အစေးခြစ်ယူနိုင်တော့မည်ဖြစ်သည်။
နမ်းခမ်းမြို့ အနောက်ဘက်ဒေသများနှင့် ပလောင်တိုင်းရင်းသားများ အဓိကနေထိုင်ရာ မန်တုံမြို့နယ်အတွင်းရှိ တောင်စောင်း၊ လျှိုမြောင်များ အတွင်း ဘိန်းခင်းများ ပြုလုပ်ထားကြပြီး နယ်မြေခံ ပြည်သူ့စစ်များနှင့် ရွှေလီရေအားလျှပ်စစ်စက်ရုံ လုံခြုံရေးတာဝန်ကျ စစ်တပ်ကို ဘိန်းခင်း ပိုင်ရှင်များက ဆက်ကြေးပေးနေရသည်ဟု နမ်းခမ်းဒေသခံတဦးက ပြောသည်။
၎င်းက “နမ်းခမ်းဘက်မှာဆို ပန်းဆေးကျော်မြင့်ရဲ့ ပြည်သူ့စစ်ရှိတယ်။ တပိုင်တနိုင် မိသားစု စီးပွားရေးအတွက် တောင်ယာလေး တွေမှာ စိုက်ထားတဲ့ဟာမျိုးဆို သူတို့တွေက ကျပ် (၁) သိန်းတောင်းတယ်။ အလုပ်သမားတွေငှားပြီး စီးပွားဖြစ်လုပ်တဲ့ ဘိန်းခင်းမျိုးကျတော့ (၃)၊ (၄) သိန်းပေးနေရတယ်တဲ့။ ရွှေလီရေအား လျှပ်စစ်စက်ရုံမှာက ခလရ (၁၄၄) ရှိတယ်။ သူတို့ကလည်း ကင်းလှည့်လာရင်းနဲ့ (၃)၊ (၄) သောင်း တောင်းတာမျိုး ရှိတယ်။ တချို့လည်း ထောင်ပိုင်းလောက်နဲ့ ပြီးသွားတာလည်း ရှိတယ်” ဟု ပြောသည်။
ဘိန်းခင်းများအားလုံးနီးပါးမှာ အပွင့်များပွင့်နေပြီး ပြီးခဲ့သည့်စက်တင်ဘာလ၌ စိုက်သည့်အပင်များမှာ ရှေ့လခန့်တွင် အစေးခြစ်၍ ရပြီဖြစ်ကြောင်း အဆိုပါ နမ်းခမ်းဒေသခံက ပြောသည်။
၎င်းက “အချို့အပွင့်က ပန်းရောင်၊ အချို့က ခရမ်းရောင်၊ အချို့က အဖြူရောင်တွေနဲ့ အတော်ကိုလှတာ။ တချို့တောင်ပေါ်က ပလောင်ရွာတွေကျတော့ အိမ်နောက်က မုန်ညှင်းခင်းထဲမှာပဲ ရောစိုက်ထားတဲ့ဟာမျိုးလည်း ရှိတယ်။ အဲဒါကျတော့ မိသားစုဝင်ငွေ နည်းနည်းပဲ ရရဆိုပြီး စိုက်တာ။ တချို့အိမ်မှာ သုံးဖို့ စိုက်တာရှိတယ်” ဟု ပြောသည်။
ဘိန်းစိုက်ထားသည့် မြေနေရာများသည် မြေဆီမြေနှစ် ကုန်ခန်းသွားပြီး မည်သည့် သီးနှံပင်ကိုမျှ စိုက်ပျိုး၍ မရသဖြင့် ဒေသခံ အများစုမှာ ဈေးကောင်းရသည့် ဘိန်းကိုသာ မြေသြဇာများသုံးပြီး နှစ်စဉ်စိုက်ပျိုးနေရသည်ဟု အဆိုပါဒေသခံက ပြောသည်။
No comments:
Post a Comment