တက်လူ
မီတာစနစ်မသုံးသော တက္ကစီအငှားယာဉ်များကို တင်းကျပ်စွာ အရေးယူမည်ဟု သတင်းထုတ်ပြန်ပြီးနောက်ပိုင်း ရန်ကုန်မြို့ရှိ ပါရမီတက္ကစီအချို့မှာ မီတာခိုး၍ ပြေးဆွဲနေကြောင်း ရန်ကုန်မြို့ခံများက ပြောသည်။
“မနေ့က မြို့ထဲကနေပြီး ဆရာစံပလာဇာကို ပါရမီတက္ကစီငှားစီးတယ်၊ အမှန်ဆိုရင် (၁,၅၀၀) ကျပ်ပဲရှိတယ်၊ မီတာနဲ့ (၂,၀၀၀) ကျော်ကျတယ်၊ မဖြစ်သင့်တဲ့ကိစ္စပါ။ ကျနော်သိရသလောက်ကတော့ မီတာကို ခိုးထားတာပါ။ ကျသင့်တာထက် ပိုနေတဲ့ အတွက်ပါ” ဟု တက္ကစီငှားစီးသူတဦးက ပြောသည်။
ပါရမီတက္ကစီများမှာ လေအေးစက်တပ်ထားပြီး ကားအသစ်များဖြစ်သောကြောင့် စီးနင်းသူများပြားပါလျက် ယင်းသို့မီတာကို ခိုးကာ ပြေးဆွဲခြင်းမှာ အခွင့်အရေးယူသည့်သဘော သက်ရောက်ကြောင်း ရန်ကုန်တိုင်း ကြိုးမဲ့ကြေးနန်းနှင့် ယာဉ်ထိန်းတပ်ဖွဲ့ရုံးမှ ယာဉ်ထိန်းရဲတဦးက ပြောသည်။
“ကျနော်တို့လည်း ကြားပါတယ်။ ခက်တာက ခရီးသည်က တိုင်တာတော့ မဟုတ်ဘူး။ မတိုင်လို့ အရေးမယူသေးတာလည်း ဖြစ်နိုင်ပါတယ်။ ကျနော်တို့လို ရာထူးငယ်သူတွေကတော့ စစ်ဆေးရေးသွားခိုင်းရင် သွားရတာလောက်ပဲရှိပါတယ်” ဟု ယာဉ်စည်းကမ်းထိန်းသိမ်းရေး ကြီးကြပ်မှုကော်မတီမှ တာဝန်ရှိသူတဦးက ပြောသည်။
ရန်ကုန်တွင် သဘာဝဓာတ်ငွေ့ (စီအန်ဂျီ) ပြောင်းလဲတပ်ဆင်ထားသည့် ပါရမီတက္ကစီ အပါအ၀င် စီးတီးတက္ကစီများကို မီတာစနစ်ဖြင့် ပြေးဆွဲရန် ညွှန်ကြားထားပြီး မီတာဖြင့် မပြေးဆွဲသော ယာဉ်များကို ယာဉ်ပြေးဆွဲခွင့်ပိတ်သည်အထိ တင်းကျပ်စွာအရေးယူကြောင်း ရန်ကုန်တိုင်း ယာဉ်စည်းကမ်း ထိန်းသိမ်းရေးကော်မတီက ပြောကြားသော်လည်း မီတာဖြင့် မပြေးသည့်တက္ကစီ အများအပြား ရှိနေဆဲဖြစ်သည်ဟု အငှားယာဉ်မောင်းတဦးက ပြောသည်။
၎င်းက “လူတွေက အထူးယာဉ်တွေပေါ်လာတော့ တက္ကစီမစီးကြတော့ဘူး။ အဲဒီလိုဖြစ်နေတဲ့အခါမှာ မီတာနဲ့မောင်းတော့ အဲဒီမီတာနဲ့ကျတော့ အများကြီး မဟုတ်ပေမယ့် (၂၀၀၊ ၃၀၀) ကျပ်လောက်တော့ သက်သာတယ်လေ။ အဲဒီတော့ တချို့က မီတာနဲ့စီးတယ်။ ပါရမီတက္ကစီက ဒါ့ကြောင့် မီတာခိုးတာဖြစ်မယ်” ဟု ပြောသည်။
ခရီးသည်များအနေဖြင့် မီတာအမှန်နှုန်းအတိုင်း ပြေးဆွဲသည့် တက္ကစီများကို စီးပါက ခရီးစရိတ်သက်သာပြီး ပါးစပ်ဈေးနှင့် ပြောဆွဲသည့် တက္ကစီများကို စီးပါက ပုံမှန်ထက် အနည်းငယ်ငွေပိုပေးရသဖြင့် မီတာဖြင့်ပြေးသည့် ပါရမီတက္ကစီများကို အများစုက စီးလာကြခြင်းဖြစ်သည်။
ထိုသို့ ခရီးသည်များ အစီးများလာသည့်အပေါ် မီတာတက္ကစီ စံပြအနေဖြင့် ပြေးဆွဲနေသည့် ပါရမီတက္ကစီလိုင်းတွင် တက္ကစီအချို့က မီတာခိုးလာကြခြင်းဖြစ်သည်။
ပါရမီတက္ကစီများ ပြေးဆွဲနေသော ဗန္ဓုလသယ်ယူပို့ဆောင်ရေး ကုမ္ပဏီလီမိတက်၏ အရာရှိကြီးတဦးက ယင်းသို့ ဖြစ်ရပ်များရှိပါက ပါရမီတက္ကစီယာဉ်လိုင်းသို့ ချက်ချင်းအကြောင်းကြား တိုင်ကြားရန် ပြောကြားပြီး ၎င်းတို့အနေဖြင့် အရေးယူသွားမည်ဟု ပြောဆိုသည်။
ယာဉ်စည်းကမ်း ထိန်းသိမ်းရေးကြီးကြပ်မှုကော်မတီမှ ယာဉ်ထိန်းရဲတဦးကမူ ပါရမီတက္ကစီ မီတာခိုးနေသည်ကို စစ်ဆေးအရေးယူခြင်း မရှိသေးကြောင်း ပြောသည်။
တက္ကစီ မီတာစနစ်တွင် ခရီးသည်က ယာဉ်ပေါ်သို့ စတက်သည်နှင့် ကျပ် (၅၀၀) ပေးပြီးသားဖြစ်ပြီး (၁) ကီလိုမီတာ ခရီးစဉ်တွင် (၁၅၀) ကျပ်နှုန်းနှင့် စောင့်ဆိုင်းခအတွက် (၁) မိနစ် (၅၀) ကျပ်နှုန်း ကောက်ခံခြင်းဖြစ်သည်။
“ပါရမီမဟုတ်တဲ့ တက္ကစီတွေ အတော်များများက ပါးစပ်ဈေးအတိုင်း ဆွဲကြတာပဲ။ ပါးစပ်ကတောင်းတဲ့အတိုင်းဆိုရင် ပိုရတာပေါ့။ လမ်းတကြောင်းဆိုရင်ပဲ (၅၀၀) ကျပ် ပိုတယ်ထားဦး တနေ့ကို (၅) ကြောင်းဆိုရင် (၂,၅၀၀) က ကိုယ့်အတွက်ကျန်နေပြီလေ။ ဒါ့ကြောင့် မီတာနဲ့ မဆွဲချင်ကြတာ” ဟု ခရီးသည်တဦးက ပြောသည်။
ရန်ကုန်မြို့တော် စည်ပင်သာယာရေးကော်မတီ နယ်နိမိတ်တွင် ပါရမီတက္ကစီနှင့် စီးတီတက္ကစီ အစီးရေ စုစုပေါင်း (၁၆,၀၀၀) ခန့်ရှိရာ ၂၀၀၈ ခုနှစ် ဇန်န၀ါရီလ (၁) ရက်အထိ စာရင်းအရ ယာဉ် (၈,၀၀၀) ကျော်ကို မီတာများ တပ်ဆင်ထားပြီးဖြစ်ကြောင်း
သိရသည်။
No comments:
Post a Comment