စိုင်းဇွမ်ဆိုင်း
မြန်မာနိုင်ငံတဝှန်း အစိုးရပိုင် စက်သုံးဆီဆိုင် ၂၄ဝ ကျော်ကို ရောင်းချရန်အတွက် အဆိုပြုလွှာများကို စစ်အစိုးရက ခေါ်ယူနေကြောင်း နေပြည်တော် သတင်းရပ်ကွက်များ အဆိုအရ သိရသည်။
နိုင်ငံတဝှန်း တိုင်း ၇ တိုင်း၊ ပြည်နယ် ၅ ပြည်နယ်အတွင်းရှိ စက်သုံးဆီပိုင် ၂၄ဝ ကျော်ကို ရောင်းချမည်ဖြစ်သဖြင့် အဆိုပြုလွှာများကို နေပြည်တော်ရှိ ပုဂ္ဂလိကပိုင်ပြုရေး ကော်မရှင်သို့ တင်သွင်းကြရမည်ဖြစ်သည်။
ရန်ကုန်တိုင်းမှ အစိုးရစက်သုံးဆီ အရောင်းဆိုင် ၅၂ ဆိုင်၊ မန္တလေးတိုင်းမှ ၃၉ ဆိုင်၊ ပဲခူးတိုင်းမှ ၃၇ ဆိုင်၊ မကွေးတိုင်းမှ ၁၅ ဆိုင်၊ စစ်ကိုင်းတိုင်းမှ ၁၄ ဆိုင်၊ မွန်ပြည်နယ်မှ ၁၆ ဆိုင်၊ တနင်္သာရီတိုင်းမှ ၆ ဆိုင်၊ ဧရာဝတီတိုင်းမှ ၂၇ ဆိုင်၊ ကချင်ပြည်နယ်မှ ၇ ဆိုင်၊ ချင်းပြည်နယ်မှ တဆိုင်၊ ရှမ်းပြည်နယ်မှ ၂၄ ဆိုင်နှင့် ရခိုင်ပြည်နယ်မှ ၆ ဆိုင်တို့ ဖြစ်သည်။
ပြီးခဲ့သည့်လ ၂၃ ရက်နေ့တွင် ဖွဲ့စည်းခဲ့သော ပုဂ္ဂလိက စက်သုံးဆီ တင်သွင်းရောင်းချ ဖြန့်ဖြူးသူများအသင်းတွင် စစ်ခေါင်းဆောင် ဗိုလ်ချုပ်မှူးကြီးသန်းရွှေနှင့် ပုဂ္ဂိုလ်ရေး ရင်းနှီးသည့် စီးပွားရေးလုပ်ငန်းရှင် ဦးတေဇ (ဥက္ကဋ္ဌ) နှင့် ဦးအောင်သက်မန်း (ဒုဥက္ကဋ္ဌ) တို့ ဦးစီးလုပ်ကိုင်နေသဖြင့် နိုင်ငံပိုင်စက်သုံးဆီ အရောင်းဆိုင် အများစုကို ရယူသွားဖွယ်ရှိကြောင်း ရန်ကုန် စီးပွားရေးအသိုင်းအဝိုင်းအကြားတွင် ရေပန်းစားနေသည်။
လိုအပ်သော အသေးစိတ် သတင်းအချက်အလက်များ ရရှိရန်အတွက် နေပြည်တော်ရှိ ပုဂ္ဂလိကပိုင်ပြုရေး ကော်မရှင်ရုံးသို့ ဆက်သွယ်စုံစမ်းရာ၌လည်း တာဝန်ရှိသူများက ဖြေဆိုရန် ငြင်းဆန်ခဲ့ကြသည်။
အဆိုပြုလွှာများ ခေါ်ယူနေသည်မှာ အကျယ်အပြန့် မရှိသဖြင့် စီးပွားရေးပညာရှင်အချို့ကမူ လွတ်လပ်သော တင်ဒါ မဖြစ်နိုင်ဟု သုံးသပ်ကြသည်။
နိုင်ငံပိုင်လုပ်ငန်းများကို ပုဂ္ဂလိက လုပ်ငန်းရှင်များထံ လွှဲပြောင်းရောင်းချခြင်းသည် ဈေးကွက်စီးပွားရေးတွင် လိုအပ်သော်လည်း ထင်သာမြင်သာရှိသင့်ကြောင်း သုံးသပ်ကြသည်။
သူက “သတင်းအချက်အလက်ရခွင့် မတူဘူးဆိုရင် ပြိုင်ဆိုင်နိုင်မှုမှာ ပြဿနာအများကြီးရှိတယ်။ တချို့လူတွေက အများကြီးသာသွားမယ်။ တချို့လူတွေက ဘာအခွင့်အရေးမှ မရဘူးပေါ့။ အဲဒါက ဘယ်လိုမျိုး ဖြစ်သွားတတ်လဲဆိုတော့ လက်ဝါးကြီးအုပ်တဲ့ အရင်းရှင်စနစ်မျိုး ဖြစ်သွားတတ်တယ်” ဟု ပြောသည်။
“ကျနော့်အမြင်ကတော့ ၂ဝ၁ဝ ရွေးကောက်ပွဲမတိုင်ခင်ပေါ့ဗျာ၊ တချို့ပစ္စည်းတွေကို အင်္ဂလိပ်လို ပြောရရင်တော့ fire sale လို့ ခေါ်တာပေါ့ဗျာ။ မီးလောင်နေတုန်းမှာ အကုန်လုံးကို ဈေးပေါပေါနဲ့ ချရောင်းတဲ့ပုံစံမျိုး ဖြစ်နေတယ်” ဟု သူက ပြောဆိုသည်။
ပြီးခဲ့သည့်နှစ်မှ စတင်ကာ စစ်အစိုးရက နိုင်ငံပိုင်ဆိပ်ကမ်းများ၊ အဆောက်အအုံများ၊ စက်သုံးဆီဆိုင်များ၊ ရုပ်ရှင်ရုံများနှင့် နိုင်ငံပိုင် လေကြောင်းလိုင်းကို ပုဂ္ဂလိက လုပ်ငန်းရှင်များထံ လွှဲပြောင်းရောင်းချလာခြင်း ဖြစ်သည်။
Subscribe to:
Post Comments (Atom)
No comments:
Post a Comment