ကိုထွေး
.ထိုင်းဝန်ကြီးချုပ်ဟောင်း စမတ်ခ် ဆွန်ထော်ရဝဲ့သည် ဘန်ကောက်ရှိ Bumrungrad နိုင်ငံတကာ ဆေးရုံတွင် အသည်း ကင်ဆာရောဂါဖြင့် ယမန်နေ့က ကွယ်လွန်သွားကြောင်း သိရသည်။
၂၀၀၈ ခုနှစ်အတွင်း တာဝန်မှ ရပ်စဲမခံရမီ ထိုင်းနိုင်ငံ ဥဒုံဌာနီ ခရိုင် လူထုကို မိန့်ခွန်းပြောနေသော ၀န်ကြီးချုပ်ဟောင်း မစ္စတာ စမတ်ခ် (ဓာတ်ပုံ - Reuters)
အသက် ၇၄နှစ်အရွယ်ရှိ ထိုင်းနိုင်ငံ၏ ၂၅ ဦးမြောက် ၀န်ကြီးချုပ် တဦးဖြစ်သော မစ္စတာ စမတ်ခ်သည် ၂၀၀၈ အောက်တိုဘာလက အသည်းကင်ဆာရောဂါ ခံစားနေရကြောင်း ထုတ်ဖော် ပြောဆိုခဲ့ပြီး ယင်းဆေးရုံတွင်ပင် လေဆာဖြင့် ခွဲစိတ် ကုသမှု ခံယူခဲ့သည်။ ထို့အပြင် ယင်း ၂၀၀၈ ခုနှစ် အတွင်း အမေရိကန်ပြည်ထောင်စုသို့ သွားရောက် ကုသမှု ခံယူခဲ့သေးသည်။
၁၉၆၈ ခုနှစ်တွင် ဒီမိုကရက်တစ်ပါတီတွင် ၀င်ရောက်၍ နိုင်ငံရေးလောကသို့ စတင် ၀င်ရောက်ခဲ့ပြီး ပြည်သူ့စွမ်းအား (ပီပီပီ) ပါတီ၏ ခေါင်းဆောင် တဦး အဖြစ် ၂၀၀၈ ခုနှစ် ဇန်န၀ါရီလ ၂၉ရက်နေ့တွင် ထိုင်းနိုင်ငံ ၀န်ကြီးချုပ် ဖြစ်လာခဲ့သည်။
ထိုင်းဝန်ကြီးချုပ်ဟောင်း သက်ဆင်ရှင်နာဝပ်၏ ထောက်ခံမှုကြောင့် ၀န်ကြီးချုပ် ဖြစ်လာခဲ့သူဖြစ်ပြီး ၎င်းတို့ ၂ ဦးလက်ထက်တွင် မြန်မာစစ်ခေါင်းဆောင်များနှင့် ပြေပြစ်သော ဆက်ဆံရေးရှိကြောင်း သုံးသပ်သူများက ဆိုသည်။
မြန်မာနှင့်ထိုင်း၂ နိုင်ငံအကြား သံတမန်အဆက်အသွယ် ပြုလုပ်ခဲ့သည့် နှစ် (၆၀) ပြည့် အထိမ်းအမှတ် အဖြစ် ၂၀၀၈ ခုနှစ် မတ်လက ၎င်းသည် မြန်မာပြည်သို့ သွားရောက်ခဲ့သည်။
ယင်းခရီးစဉ် အပြီး မြန်မာ့စစ်ခေါင်းဆောင် ဗိုလ်ချုပ်မှူးကြီး သန်းရွှေကို ဘာသာရေးကိုင်းရှိုင်းသူ တဦးဖြစ်သည် ဟူသော ပြောဆိုမှုများကြောင့် ထိုင်းနိုင်ငံ၏ ဒီမိုကရေစီ အလေးထားသူများက ဝေဖန်ပြောဆိုမှုများ ဖြစ်ပေါ်ခဲ့သေးသည်။
ထို့အပြင် ၂၀၀၈ ခုနှစ် သြဂုတ်လကုန်ပိုင်း ကလည်း ဒေါ်အောင်ဆန်းစုကြည်နှင့် တွေ့ခွင့်မရဘဲ မြန်မာ နိုင်ငံမှ ပြန်လည်ထွက်ခွာလာသည့် ကမ္ဘာ့ကုလသမဂ္ဂ အထွေထွေအတွင်းရေးမှူးချုပ်၏ မြန်မာနိုင်ငံ ဆိုင်ရာ အထူး အကြံပေးပုဂ္ဂိုလ် မစ္စတာ အီဗရာဟင် ဂန်ဘာရီနှင့် တွေ့ဆုံစဉ် မြန်မာ့ဒီမိုကရေစီရေးအတွက် မြန်မာ စစ်အစိုးရနှင့် တွေ့ဆုံညှိနှိုင်းရာတွင် ဒေါ်အောင်ဆန်းစုကြည် မပါရှိပါက ပိုမိုအလုပ်ဖြစ်နိုင်ကြောင်း၊ အနောက်နိုင်ငံများက ဒေါ်အောင်ဆန်းစုကြည်ကို နိုင်ငံရေး အရ အသုံးချခံ ကိရိယာတခုကဲ့သို့ ပြုလုပ်နေကြောင်း မစ္စတာ စမတ်ခ်က ပြောဆိုခဲ့သေးသည်။
ဝန်ကြီးချုပ် အဖြစ်တာဝန်ထမ်းဆောင်ခဲ့ အပြီး ၈လအကြာ မစ္စတာ စမတ်ခ်အား ထိုင်းပုဂ္ဂလိက ရုပ်မြင်သံကြား ဌာန ၂ ခု တွင် အခကြေးငွေယူ၍ အချက်အပြုတ် အစီအစဉ် တင်ဆက်သောကြောင့် ထိုင်းနိုင်ငံ ဖွဲ့စည်းပုံ ဆိုင်ရာ အခြေခံဥပဒေဆိုင်ရာ တရားရုံး က အခြေခံဥပဒေချိုးဖောက်မှုဖြင့် ၂၀၀၈ ခုနှစ် စက်တင်ဘာလ ၉ ရက်နေ့တွင် ၀န်ကြီးချုပ်တာဝန်မှ ရပ်ဆိုင်းသည့် စီရင်ချက် ချမှတ်ခဲ့သည်။
ထိုင်းနိုင်ငံ၏ အခြေခံဥပဒေ၌ အစိုးရအဖွဲ့ဝင် ၀န်ကြီးများ သည် နိုင်ငံတာဝန် ထမ်းဆောင်နေချိန်အတွင်း ပုဂ္ဂလိက လုပ်ငန်းများတွင် လုပ်ကိုင်ခြင်း မပြုရန် တားမြစ်ထားကြောင်း သိရသည်။
မစ္စတာ စမတ်သည် ၁၉၃၅ ခုနှစ် ဇွန်လတွင် ထိုင်းနိုင်ငံ ဘန်ကောက်တွင် မွေးဖွားခဲ့သော တရုတ်နွယ်ဖွား တဦးဖြစ်သည်။
No comments:
Post a Comment