ခိုင်လင်း
ရှမ်းပြည်မြောက်ပိုင်း၊ ကွတ်ခိုင်မြို့နယ်အတွင်း ဘိန်းနှင့်ဘိန်းဖြူ လက်လီရောင်းချသည့်အိမ် များပြားလာနေပြီး နယ်မြေခံ ရဲတပ်ဖွဲ့ဝင်များက ဆက်ကြေးတောင်းနေသကဲ့သို့ ၎င်းတို့ကိုယ်တိုင် သုံးစွဲမှုများ ရှိနေသည်။
ကွတ်ခိုင်မြို့ရှိ စုစည်းရပ်ကွက်တခုလုံးနီးပါး ဘိန်းနှင့်ဘိန်းဖြူ ရောင်းချနေပြီး ရဲတပ်ဖွဲ့ဝင်များလည်း ဘိန်းဖြူသုံးစွဲနေကြောင်း ဘိန်းသုံးစွဲဖူးသူ ကွတ်ခိုင်ဒေသခံတဦးက ပြောသည်။
၎င်းက “စုစည်းရပ်ကွက်မှာ အိမ်ခြေ (၁၀၀) လောက်ရှိမယ်။ ကချင်နဲ့တရုတ်တွေ များတယ်။ သူတို့က အိမ်တွေမှာ ကျပ် (၁,ဝဝဝ) လောက် လိုက်တောင်းတယ်။ အချို့အိမ်ကျတော့ ငွေမတောင်းဘူး၊ ဆေးတောင်းပြီး သူတို့ကိုယ်တိုင် ရှူတယ်။ အချို့ကျတော့လည်း ကျပ် (၅,ဝဝဝ) ဖိုးလောက် ရှူသွားရင် (၂,ဝဝဝ - ၃,ဝဝဝ) ပေးတာမျိုးတော့ ရှိတယ်။ အဲဒါက သူတို့ ရေတွေလျှံတဲ့အချိန် စိတ်ကောင်းဝင်တဲ့ အချိန်မျိုး၊ မပေးတာကတော့ များတယ်။ ဒီကောင်တွေ အိမ်ထဲ ရောက်နေပြီဆိုရင် အိမ်ရှင်တွေက အိမ်ရှေ့ထွက်ပြီး ဖောက်သည်တွေကို ပြန်လွှတ်ပေးနေရတယ်။ သူတို့ရှူနေရင် တခြားသူတွေကို ပေးမဝင်ခိုင်းဘူး” ဟု ပြောသည်။
ကွတ်ခိုင်ရဲတပ်ဖွဲ့ဝင်များသည် ဘိန်းခန်းမှရရှိသည့်ငွေများ၊ ဒေသအတွင်း ဖြတ်သန်းသွားလာနေသည့် ဆိုင်ကယ်မှောင်ခို၊ နွားမှောင်ခိုနှင့် ကယ်ရီသမားများထံမှ တောင်းခံရရှိသည့် ငွေကြေးများကို အထက်ရဲအရာရှိများကို ခွဲဝေပေးကမ်းနေသကဲ့သို့ တပ်ဖွဲ့ရန်ပုံငွေများထဲ ထည့်ဝင်ပေးနေသဖြင့် ဘိန်းခန်းများအတွင်း လှည့်လည်ဘိန်းသုံးစွဲခွင့် လွတ်လပ်စွာ ရရှိနေသည်ဟု အဆိုပါ ကွတ်ခိုင်ဒေသခံက ပြောသည်။
၎င်းက “တခါတလေ ကျနော်တို့က ခတ်ခူး (ဘိန်းမဲ ) ရှူနေတုန်း သူတို့တွေ ရောက်လာတာမျိုး ရှိတတ်တယ်။ အဲဒီအခါ ကျနော်တို့ကလည်း မြန်မြန်လေးလုပ်ပြီး ရှောင်ပေးရတာတွေရှိတယ်။ အဲဒီမှာ ငွေတောင်းတဲ့ကိစ္စ၊ ဘယ်အရာရှိ ဘယ်လောက်ပေးလိုက်ရတဲ့အကြောင်း သူတို့အချင်းချင်း ပြောတတ်ဆိုတတ်တယ်။ သူတို့က အောက်ကတော့ ဘောင်းဘီပေါ့။ အပေါ်ကတော့ အရပ်ဝတ်နဲ့။ အချို့လည်း ရိုးရိုးအရပ်ဝတ်နဲ့ လာနေကြတာပဲ” ဟု ပြောသည်။
ပြီးခဲ့သည့် သြဂုတ်လကုန်ပိုင်း ကိုးကန့်အရေးအခင်းကာလအတွင်း အထက်မှတာဝန်ပေးချက်အရ ကွတ်ခိုင်ရဲစခန်းမှ အင်အားဖြည့်အနေဖြင့် ရဲတပ်ဖွဲ့ဝင်များအား လောက်ကိုင်သို့ စေလွှတ်ခဲ့ရာတွင် ဘိန်းမစွဲသည့် ရဲများကိုသာ ထုတ်နုတ်ပြီး အင်အားအနည်းငယ်သာ ပို့ပေးနိုင်ခဲ့ကြောင်း ရဲစခန်းနှင့် နီးစပ်သည့် သတင်းရပ်ကွက်အရ သိရသည်။
Subscribe to:
Post Comments (Atom)
No comments:
Post a Comment