နယူးဒေလီက ဆေးပေါင်းခတဲ့ည

ဇာနည်မာန်
အိန္ဒိယနိုင်ငံ နယူးဒေလီမြို့ အရှေ့ဘက်ရှိ Purana Quilaနန်းမြို့ဟောင်း ရင်ပြင်တနေရာရှိ ရှေးဟောင်း အဆောက်အအုံများကြား တေးဂီတ ဖျော်ဖြေပွဲ ပြုလုပ်မည့် ကွင်းပြင်တွင် သောင်းချီသော ဂီတမြတ်နိုးသူများဖြင့် ပြည့်ကြပ်နေပြီး စတိတ်စင်ကို မြင်နိုင်ရန် ဆလိုက်ထိုးပြမည့် ပိတ်ကားချပ်များ၊ ရောင်စုံဆလိုက်မီးများဖြင့် စည်ကား လှပနေသည်။


အိန္ဒိယ ယဉ်ကျေးမှု ဆက်ဆံရေး ကောင်စီက ဦးစီးကျင်းပသည့် တတိယအကြိမ်မြောက် တောင်အာရှ ဂီတပွဲတော်တွင် မြန်မာနိုင်ငံမှ တေးသံရှင် ဇော်ဝင်းထွဋ် ဦးဆောင်သော အင်ပါယာတေးဂီတအဖွဲ့လည်း လာရောက် ဖျော်ဖြေမည်ဖြစ်သောကြောင့် မြန်မာတေးသံများကို လွမ်းဆွတ် တောင့်တနေသော အိန္ဒိယနိုင်ငံရောက် မြန်မာများပါ လာရောက်စုဝေး နေကြသည်။

နယူးဒေလီတွင် လက်စွမ်းပြနေသော အင်ပါယာတီးဝိုင်း
တေးသံရှင် ဇော်ဝင်းထွဋ်က “ဆေးပေါင်းခတဲ့ ည” သီချင်းကို သီဆိုလိုက်ချိန်တွင် သူ့ကိုချစ်သော မြန်မာလူငယ်ပရိသတ်တို့က သံပြိုင်အော်ဟစ် အားပေးကာ သီချင်းကို လိုက်ဆိုကြသည်။

ဇော်ဝင်းထွဋ်၏ တခြား ထင်ရှားသည့် သီချင်းများဖြစ်ကြသော ပဲ့ကိုင်ရှင်၊ အသည်းကွဲရေဒီယို၊ ဘာမှမရှိတော့ဘူး ဆိုသည့် သီချင်းများကို သီဆိုဖျော်ဖြေခဲ့ရာ မြန်မာပရိသတ် အပါအ၀င် အိန္ဒိယ ပရိသတ်များပါ နှစ်ခြိုက်အားပေးခဲ့သည်။

မြန်မာတေးသံရှင်များနှင့် ထိတွေ့ခွင့်မရသကဲ့သို့ မြန်မာစတိတ်ရှိုးများနှင့် ကင်းဝေးနေကြသည့် အိန္ဒိယရောက် မြန်မာ များ အဖို့ ဤဂီတပွဲမှာ ကြည်နူးချမ်းမြေ့စရာ ပွဲတခုဟု ဆိုရမည်ပင်။

“ဒါမျိုး မကြည့်ရတာကြာတော့ အရမ်းလည်းပျော်တယ်။ စိတ်ထဲမှာ မြန်မာပြည်ကို ပြန်ရောက်သွားသလိုပဲ။ မြန်မာပြည်မှာ စတိတ်ရှိုးကြည့်နေတဲ့ ပုံစံမျိုးပေါ့။ ခံစားမှုတွေကအများကြီးပဲ” ဟု တေးဂီတပွဲ သွားရောက်ခဲ့သည့် ကိုဆလိုင်းက ပြောသည်။

ဇော်ဝင်းထွဋ်က ဗုံငယ်လေးများကို တီးခတ်ဖျော်ဖြေချိန်တွင်တော့ ဗုံ တီးခတ် သီဆိုလေ့ရှိသည့် အိန္ဒိယ ပရိသတ်က ဆူညံစွာ အော်ဟစ် အားပေးသည်။

“သူဆိုသွားတဲ့သီချင်းသံကို နားမလည်ပေမယ့် သီချင်းသံတွေက နားထောင်လို့ ကောင်းတယ်။ ကျနော်တို့ အားလုံးက သူတို့ကို အဆင့်မြင့်တဲ့ အဖွဲ့တဖွဲ့လို့ လက်ခံကြပါတယ်” ဟု အိန္ဒိယ နိုင်ငံသားတဦးက ပြောသည်။

ဒီဇင်ဘာ ၁၁ ရက်မှ ၁၃ ရက်နေ့အထိ ၃ ရက်ကြာ ကျင်းပသော ပွဲတော်တွင် ၀င်ကြေးကို အခမဲ့ သတ်မှတ်ပေးထားပြီး အိန္ဒိယ နိုင်ငံမှ နာမည်ကြီး Shankar-Ehsaan-Loy ရော့ခ်တီးဝိုင်း အပါအ၀င် ရိုးရာအတီးအမှုတ်များ၊ ပါကစ္စတန်နိုင်ငံမှ Zinda အဖွဲ့၊ ဘင်္ဂလားဒေ့ရ်ှမှ Nagarbul & James အဖွဲ့၊ မော်လ်ဒိုက်မှ Fa'Thu and The Early Birds အဖွဲ့နှင့် နီပေါနိုင်ငံ၊ ဘူတန်နိုင်ငံ တို့မှ တီးဝိုင်းအဖွဲ့များ ပါဝင်ဖျော်ဖြေခဲ့သည်။

ယခင်နှစ်များက ကျင်းပသည့် တောင်အာရှ တေးဂီတပွဲတော်တွင် မြန်မာနိုင်ငံကို ဖိတ်ကြားခြင်းမရှိခဲ့ပေ။

တေးသံရှင် ဇော်ဝင်းထွဋ်က “ကျနော်တို့ကို မြန်မာပြည်က ရော့ခ် Band တွေကို ကိုယ်စားပြုပြီး ခေါ်တယ်ဆိုတော့ သီချင်းတွေက ကိုယ်ပိုင်သံစဉ်တွေ ဖြစ်အောင် စဉ်းစားတယ်။ ကျန်တာမစဉ်းစားဘူး။ ဒီလိုပွဲမျိုး ကျနော်ရန်ကုန်မှာ တအားလုပ်ချင်တယ်။
နယူးဒေလီရောက် မြန်မာပြည်သားများနှင့်အတူ တွေ့ရသော ဇော်ဝင်းထွဋ်
ဘူတန်က ဝိုင်းတို့၊ နီပေါကဝိုင်းတို့ တအားကောင်းတာပဲ။ သူတို့ကို ဆက်သွယ်ပြီး ရန်ကုန်မှာ တပွဲလုပ်မယ် ရအောင်လုပ်မယ်လို့ ဆုံးဖြတ်ထားတယ်။ အဲဒါကြောင့်လည်း ဒီပွဲမှာပါဖို့ လက်ခံလိုက်တာ” ဟု ပြောသည်။

ဇော်ဝင်းထွဋ်က မြန်မာပရိသတ်များကို တွေ့လိုက်ရချိန်တွင် အလွန်ဝမ်းသာမိကြောင်း၊ မြန်မာများ ရှိနေသည်ကို သိသော်လည်း သွားရ လာရခက်ခဲသောကြောင့် လာမည် မထင်ကြောင်း ပြောသည်။

“သူတို့အသံကြားတော့ တော်တော်လေးလည်း စိတ်ထိခိုက်သွားတာ။ ဒီလောက်လေးပဲ ဆိုပေးရတာ အားမရဘူး။ ကျနော်တို့က အခြေအနေမပေးသေးလို့ဝေးနေရတာပေါ့နော် တချိန်ကြရင် အကုန်လုံး တပျော်တပါးကြီး ပြန်ဆုံမယ်ဆိုတာ ကျနော် အနံ့ရ နေပါတယ်” ဟု ဇော်ဝင်းထွဋ်က ဆိုသည်။

အင်ပါယာ ၀ိုင်းတော်သားများအနေဖြင့် ယခုကဲ့သို့ နိုင်ငံတကာပွဲများသို့ တက်လှမ်းခွင့်ရသည်ကိုလည်း ပျော်ရွှင် ဂုဏ်ယူသည်ဟု ပြောသည်။

အင်ပါယာမှ ဒရမ်မာ ကိုရဲလင်းက “အင်ပါယာမှာ ပါဝင်တီးခတ်ခဲ့တာ ၁၃ နှစ်ရှိပြီ။ ဒီလိုမျိုးမရောက်ဖူးဘူး။ တီးဝိုင်း မျိုးစုံနဲ့ တီးခတ်ရတာပျော်တယ်။ မြန်မာတွေဒီလောက်များမယ်လည်း မထင်ဘူး။ နိုင်ငံကိုယ်စားပြုလာရတော့ ပိုဂုဏ်ယူမိပါတယ်” ဟု ဆိုသည်။

ဘေ့စ်ဂစ်တာ သမား ကိုမြတ်မိုးကလည်း “မြန်မာပရိသတ်နည်းပေမယ့် ကျနော်တို့ ဖန်တီးတဲ့ဂီတကို ဒီမှာရှိတဲ့ လူတွေအကုန်လုံး ခံစားနိုင်မှာပါ။ အခုလို လာရတဲ့အတွက် ဂုဏ်ယူပါတယ်” ဟု ပြောသည်။

သက်တမ်း ၂၅ နှစ်ကျော်ကြာရှိပြီဖြစ်သော အင်ပါယာတေးဂီတအဖွဲ့သည် နယူးဒေလီမှ တေးဂီတပွဲ အပြီးတွင် အိန္ဒိယအရှေ့မြောက်ပြည်နယ်ရှိ ရှီလောင်းမြို့တွင်လည်း ဖျော်ဖြေမှုများ သွားရောက်ပြုလုပ်ဦးမည်ဟု သိရသည်။

ဂီတ၀ါသနာရှင် မြန်မာ တဦးက “ကျနော်တို့မြန်မာတွေအတွက်ကတော့ မြန်မာပြည်က ဘယ် တီးဝိုင်းပဲလာလာ အမြဲကြိုဆိုပါတယ်ဗျာ။ ကိုယ့်ရဲ့ဆွေမျိုး အရင်းအခြာတွေ ကိုယ့်ကိုလာတွေ့သလိုပဲပေါ့၊ အရမ်းဝမ်းသာတယ်” ဟု ဆိုသည်။

နှစ်ပေါင်း ရာချီကြာမြင့်ပြီဖြစ်သော ရှေးလက်ရာ အဆောက်အအုံဟောင်းများကြားရှိ ရောင်စုံ မီးရောင်များအောက်တွင် ရော့ခ်တေးသွားများ၊ ရိုးရာ တူရိယာတေးသီချင်းများ၊ ဇော်ဝင်းထွဋ်၏ တေးသံများနှင့် အတူ စီးမျောကခုန် သီဆိုနေကြသည့် မြန်မာတို့မှာ သူတို့ ခံစားနေရသည့် စိတ်ဆင်းရဲမှုများ၊ မွမ်းကြပ်ခြင်းများကို ခေတ္တ မေ့ပျောက်နေသည်ဟု ထင်ရသည်။