နရီလင်းလက်
.တနိုင်ငံလုံးတွင် အသုံးပြုနိုင်သည့် လက်ရှိ ငွေကျပ် ၁၅ သိန်း ပေးသွင်းရသော GSM မိုဘိုင်းဖုန်းများကို နေပြည်တော် မြန်မာ့ဆက်သွယ်ရေးလုပ်ငန်းက ငွေကျပ် ၅ သိန်းဖြင့် ယခုလမှ စတင် ရောင်းချပေးသွားမည်ဟု သတင်းရရှိသည်။
တည်ဆောက်နေသည့် GSM ရေဒီယို စခန်းပေါင်း ၃၀ ကျော်အနက် ရေဒီယိုစခန်းတချို့ ပြီးစီးသွားခြင်းနှင့် ဈေးကွက် ၀ယ်လိုအားများနေသည့် ၅ သိန်းတန် CDMA နှင့်အပြိုင် ဈေးနှုန်း လျှော့ချလိုက်ခြင်းလည်း ဖြစ်နိုင်ကြောင်း နေပြည်တော် ဆက်သွယ်ရေးအသိုင်းအ၀န်းမှ သိရသည်။
နေပြည်တော် မြန်မာ့ဆက်သွယ်ရေး လုပ်ငန်းမှ ဝန်ထမ်းတဦးက “အရင်တုန်းက ၁၅ သိန်းသွင်းမှ ရတဲ့ဖုန်းနဲ့ အခု ၅ သိန်းသွင်းပြီး ရမယ့်ဖုန်းက နံပါတ်ကလွဲပြီး အရည်အသွေး အကုန်အတူတူပါပဲ။ အာဏာပိုင်တွေဘက်က ဆက်သွယ် ရေးစနစ်တွေ ပိုကျယ်ပြန့်လာအောင် ဆိုပြီး ဒီနှစ်ထဲမှာ ၅ သိန်း တန် CDMA ဖုန်းတွေကို လျှောက်သလောက် ချပေးနေ သလို GSM ဖုန်းလိုင်းကို ၅ သိန်းနဲ့ ဈေးလျှော့ပေးလိုက်တဲ့ သဘောပါပဲ” ဟု ပြောသည်။
GSM ဖုန်း လျှောက်ထားလျှင် ကျပ် ၁၅ သိန်းနှင့်အတူ ဖုန်းခေါ်ဆိုခအတွက် ကြိုတင်ပေးငွေ ကျပ် ၅ သောင်းပါ ထပ်ဆောင်းပေးသွင်းခဲ့ကြရပြီး ဖုန်းခေါ်ဆိုခကို နေပြည်တော်အတွင်း ခေါ်ဆိုပါက တမိနစ်လျှင် ၅၀ ကျပ်၊ နယ်မြေကျော်ခေါ်ဆိုပါက တမိနစ် လျှင် ၆၀ ကျပ် သတ်မှတ်ထားကြောင်း သိရသည်။
GSM ဖုန်းအတွက် ပေးသွင်းငွေ ကျပ် ၁၅ သိန်း ၅ သောင်း ရှိသောကြောင့် ဖုန်းလျှောက်ထားသူ နည်းပါးကြောင်း၊ ဈေးနည်းသော်လည်း လိုင်းအကန့်အသတ်မရှိ ချထားပေးနေသည့် ၅ သိန်းတန် CDMA (450 Mhz, 800 Mhz) ဖုန်းလိုင်းများကို သုံးစွဲသူပိုမိုများကြောင်း သုံးစွဲသူများက ပြောသည်။
စစ်အစိုးရနှင့် နီးစပ်သည့် စီးပွားရေးလုပ်ငန်းရှင် ဦးတေဇသည် ကျပ် ၅ သိန်းတန် CDMA တယ်လီဖုန်းလိုင်းစနစ်ကို စတင် မိတ်ဆက်ခဲ့သည်။ ယခုအခါ ၎င်းပိုင် ထူးကုမ္ပဏီ၏ လက်အောက်ခံ Central Marketing ကုမ္ပဏီက CDMA တယ်လီဖုန်း ဟန်းဆက်များ ထုတ်လုပ်ရောင်းချနေပြီး တခါသုံး တယ်လီဖုန်းကတ်များကိုလည်း မြန်မာ့ ဆက်သွယ်ရေးလုပ်ငန်းနှင့် အကျိုးတူ ပူးပေါင်းဆောင်ရွက်ခွင့် ရရှိထားကြောင်း သိရသည်။
မြန်မာ့ဆက်သွယ်ရေး လုပ်ငန်းမှ အင်ဂျင်နီယာတဦးက “မိုဘိုင်းဖုန်းဈေးကွက်မှာ ၅ သိန်းတန် CDMA ဖုန်းတွေက တော်တော်နေရာယူလာတော့ GSM ဖုန်းတွေ မပျောက်သွားအောင် ပြန်လုပ်တာရယ်၊ CDMA လို အကျိုးတူမဟုတ်ဘဲ ဆက်သွယ်ရေးက ကိုင်ထားတဲ့ ဖုန်းလိုင်းကို သုံးစွဲသူများအောင် လုပ်ချင်တာရယ်ကြောင့်လို့ ထင်ပါတယ်” ဟု ပြောသည်။
၎င်းက ဆက်လက်၍ “နေပြည်တော်မှာလုပ်သွားတဲ့ ကျောက်မျက် အရောင်းပြပွဲမှာ ကျောက်စိမ်းအတွဲ ၆၀၀၀ ကျော် ရောင်းရခဲ့တယ်။ အာဏာပိုင်တွေက ဒီနှစ်က စပြီး နေပြည်တော်မှာ ကျောက်မျက်ရတနာပွဲကို ၃ လ ၁ ကြိမ် လုပ်သွားဖို့ရှိတယ်။ ဒီတော့ GSM ဖုန်းတွေ သုံးလို့ရအောင် ထပ်ချပေးတာ” ဟု ပြောသည်။
ပြီးစီးသွားသည့် နေပြည်တော် ကျောက်မျက် အရောင်းပြပွဲကာလ မတိုင်မီ ပြပွဲလာရောက်ကြသည့် နိုင်ငံခြားသားများ GSM တယ်လီဖုန်းများကို နေပြည်တော်၌ အသုံးပြုခွင့်ရရန် စစ်အစိုးရက စီစဉ်ပေးခဲ့သည်။
GSM တယ်လီဖုန်းများကို ပြည်တွင်းလိုင်း ပိုမိုကောင်းမွန်စေရန်နှင့် ပြည်ပသို့ အလွယ်တကူ ဆက်သွယ်အသုံးပြုနိုင်ရန် စီစဉ်နေကြောင်း၊ ထပ်မံကျင်းပသွားမည့် ကျောက်မျက်ရတနာ အရောင်းပြပွဲများတွင် ထိုင်း၊ တရုတ်၊ စင်ကာပူ နိုင်ငံများမှ ဖုန်းအ၀င်ခေါ်ဆိုမှုကို လွယ်ကူစေရန် ပြည်ပနှင့် ညှိနှိုင်းဆွေးနွေးနေသည့် အစီအစဉ်များလည်း ရှိကြောင်း သိရသည်။
ဆက်သွယ်ရေးညွှန်ကြားမှူး ဦးစီးဌာနမှ အရာရှိ တဦးက “နေပြည်တော်ကို အဓိကထားပြီး တခုခုဆို အရင်လုပ်နေတာ။ အရင်က ပြောလို့မရတဲ့ GSM ရော CDMA ရော နေပြည်တော်မှာ ရပြီ။ လာမယ့် ဇန်န၀ါရီ ၁ ရက်နေ့က စပြီး အာရှ ၃ နိုင်ငံ (ထိုင်း၊ တရုတ်၊ စင်ကာပူ) က ခေါ်တဲ့ အ၀င်ခေါ်ဆိုမှုတွေ အကုန်ရမယ်” ဟု ပြောသည်။
GSM နှင့် CDMA ဖုန်းလိုင်းသစ် ၄ သိန်းကျော် ထပ်မံချထားပေးနိုင်ရန်အတွက် ရေဒီယိုစခန်း ၂၀၀ ကျော်ကို ဆက်လက်တည်ဆောက်ရန် စီစဉ်နေကြောင်းလည်း သိရသည်။
ယခုလက်ရှိတွင် GSM ရေဒီယို စခန်းပေါင်း ၃၀၊ CDMA 450 Mhz ရေဒီယိုစခန်း ၁၅၁ ခု၊ CDMA 800 MHz ရေဒီယိုစခန်း ၄၂ ခု တို့ကို ဆောက်လုပ်လျက်ရှိပြီး ပြီးစီးသွားပါက မြန်မာတနိုင်ငံလုံးတွင် မိုဘိုင်းဖုန်း အရေအတွက် ၆၁၀၀၆၁ လုံး ရှိလာမည်ဟု မြန်မာ့ဆက်သွယ်ရေး ၀န်ကြီးဌာနက ထုတ်ပြန်ထားသည်။
၂၀၁၀ ပြည့်နှစ် ဇူလိုင်လအထိ GSM ဖုန်း ၄၉၄၃၀၀၊ CDMA မိုဘိုင်းဖုန်း ၅၄၅၆၅၀၊ CDMA 800တယ်လီဖုန်း ၁၅၀၀၀၀၊ CDMA (Fixed) တယ်လီဖုန်း ၂၀၀၃၈လုံး၊ WCDMAတယ်လီဖုန်း အလုံးရေ ၂၈၀၀၀ တို့ ချထားပေးပြီးဖြစ်ကြောင်း သိရှိရသည်။
Subscribe to:
Post Comments (Atom)
No comments:
Post a Comment